11 پیر , دسمبر 2017

شيخ اياز ۽ سعيد ميمڻ کي ڀيٽا: هر يونيورسٽي ۾ ”اياز چيئر“ قائم ٿيڻ گهرجي: ستار پيرزادو| پروگرام : تخليق

ڪراچي (ٽي وي نيوز): سينيئر اديب ۽ شاعر ستار پيرزادي چيو آهي ته شيخ اياز، شاهه ڀٽائي کانپوءِ سنڌي ٻولي ۽ ادب جو قيمتي سرمايو آهي. اياز سنڌيءَ ٻوليءَ ۽ شاعريءَ ۾ نوان لفظ آندا ۽ ٻولي کي جيڪا نئين معنيٰ ڏني سا سندس عظيم خدمت آهي، اهڙو اظهار هن شيخ اياز جي 28 ڊسمبر تي ٿيندڙ ورسي جي مناسبت سان عوامي آواز ٽي وي جي هفتيوار ادبي پروگرام تخليق ۾ ميزبان زرار پيرزادو سان ڳالهائيندي ڪيو. ستار پيرزادي چيو ته شيخ اياز پنهنجي حياتي ۾ سنڌ کي 65 ڪتاب ڏنا. اڄ اياز اسان ۾ موجود ناهي ته هاڻي اياز جي اڻ ڇپيل لکڻيون ڇپرائي پڙهندڙن تائين پهچائڻ گهرجي. هڪ سوال جي جواب ۾ ستار پيرزادي چيو ته شيخ اياز چوندو هو ته  صدين کانپوءِ جڏهن مان نه هوندس تڏهن سنڌي قوم کي منهنجو قدر ٿيندو پر اهو تڏهن ٿيندو جڏهن اسان ۾ شيخ اياز جو تخليقي ڪم صدين تائين برقرار رکڻ جي اهليت هوندي. هن چيو ته ان لاءِ ضروري آهي ته شاهه لطيف يونيورسٽي ۾ قائم اياز چيئر وانگر سنڌ جي هر يونيورسٽي ۾ اياز چيئر قائم ٿيڻ گهرجي. ستار چيو ته جيڪا هڪڙي چيئر قائم ٿيل آهي سا به فعال ناهي. ٻيو ته پرائمري جي ٽئين درجي کان وٺي گريجوئيشن تائين شيخ اياز جي شخصيت کي نصاب ۾ شامل ڪرڻ گهرجي. پروگرام ۾ سعيد ميمڻ جي لاڏاڻي تي سوڳواريت جو اظهار ڪندي ناليواري شاعر اسد مڱڻهار چيو ته سعيد ميمڻ هڪ منفرد شاعر هو. هن وائي ۽ بيت ۾ نواڻ آندي. هن چيو ته شيخ اياز به سعيد ميمڻ کي ساراهيو هو ۽ اها سعيد ميمڻ جي ڪاميابي هئي. هن چيو ته ادارن کي گهرجي ته سعيد ميمڻ جي رهيل ڪم کي ڇپرائي.

هي به ڏسي سگهو ٿا

نيوز: ڪستو اڇلائڻ جا دعويدار حڪمرانن ملڪ جو ڏيوالو ڪڍي ڇڏيو آهي: ڊاڪٽر معراج الهدى صديقي

جماعت اسلامي سنڌ جي امير ڊاڪٽر معراج الهدى صديقي چيو آهي ته ڪستو اڇلائڻ جي …

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے